Che mandu’a ningo che
mba’éicha pe kuarahy
otini pe che apére
che jyvare térã che akã ári
agueroguatáro guare
umi chipa aku asýva
ikajajýva kesúgui…
ahepyme’ẽ haguã
Táva Hernandarias-pe.
Oĩ ára y’uhéigui ajerure rure mante
y ro’ysãmi umi óga háre
oĩme va’ekue kuñakarai
mba’e porãva ombohasáva chéve.
Ára ha ára, tove kuarahy,
téra amaguýpe…
Ára haku, ara ro’ype
asẽ katuetémi che ajakami
che jyváre aikuare’ẽ chipami
che sy marangatu ojapo va’ekue.
Péicha ahasa va’ekue
che mitãkuña guasuro guare
ikatu haguãicha agueru avei
pira pire’imi che rógape
ajogua joguave haguã
kuati’ahaipyre…
ha opaichagua che remikotevẽ
Ko’ãnga che mandu’arõ
umi che rembiasakue
apuka guymi che retepýpe,
che recháva tapicha
ndogueroviaichéne
mba’éichapa chiperakuemi
okakuaa ha oiko chugui
kuña pyapy mbarete
ikatupyrýva ñe’ẽpapára.
©Mabel Coronel Cuenca
